فيني قلكم شويّة اشيا،،،
بس ما فيني قلكم كل الاشيا،،،
فيني قلكم أوّل يوم قضيّتو بالجامعة اللبنانية،،،
بس ما فيني قلكم الصدمة يلي انصدمتها،،،
فيني قلكم لما الرفقاتي قالولي:" هيدي كانت مركز لبغال الجيش الفرنسي"،،،
بس ما فيني قلكم ازا بعدن هون، أوازا تطوّروا وصاروا شي غير،،،
فيني قلكم لما فتت عالصف وشفت قاعة الــ200 فيها 700 تلميذ،،،
بس ما فيني قلكم ليش هالعدد كلو كان موجود، اكيد ما كلن جدد،،،
فيني قلكم لما الدكتور قلنا:" انتو بدكن تصيروا متلي" ،،،
بس ما فيني قلكم كام قتيل كنا قاتليلو حتى يحقد علينا هالقد،،،
فيني قلكم لما قدمنا مادة المنطق كنا بالميات، تلاميذ تانية وتلاميذ تالتة كلنا عدناها،،،
بس ما فيني قلكم شوفة الحال بالعلامة، كنت واحد من الـ 215 تلميذ يلي جابوا 1/100،،،
فيني قلكم ع دكتورة لما انقهرت من زميلا يلي سقط عندو أكتر منها،،،
بس ما فيني قلكم شو صار فينا بالدورة يلي بعدا، بتصوّر فيكن تتخيلوا ليش بس 4 قطعوا بالمادة،،،
فيني قلكم لما علقت بمادة وحدة عالتخرّج،،،
بس ما فيني قلكم كيف صارت 6 مواد وراحت سنة هيك،،،
فيني قلكم انو كتير من التلاميذ بيهربوا وبيتركوا التعليم،،،
بس ما فيني قلكم قديش منن بيعلقوا ع مادة وبيروّحوا سنين،،،
فيني قلكم انو في دكاترا هسترونا وجابولنا الضغط وع شوي السكري،،،
بس ما فيني قلكم احنا شو عملنالن حتى هيك علموا فينا،،،
فيني قول لدكاترة لولاكن ما بعرف شو كان صار فيني،،،
بس ما فيني قلكم شو بدعي ع غير دكاترا،،،
فيني قلكم انو الجامعة اللبنانية، جامعة تعليب،،،
بس ما فيني قلكم قديش تعذبّت وأهنت فيّا،،،
فيني قلكم انو كتير من يلي لح يقرأ هالشي بدو يسب عليّ،،،
بس ما فيني قلكم انو انا اكيد انن يا دكاترة يا مسّيحة جوخ عند الدكاترا،،،
فيني قلكم انو يلي بدو يضيّع سنين، يفوت عاللبنانية،،،
بس ما فيني قلكم كام سنة لح تضيعوا، انتو وحظكن، أربعا، خمسة وازا بدكم عشرا،،،
فيني قلكم انا ضجرت من النق منها، وأكيد انتو كمان،،،
بس ما فيني قلكم قديش بدعي انو الله يكون بعون يلي بدو يتسجّل فيها،،،
Tweet
