فَضُوحلِّي... والحلّ أبو سعيد الُبويَجي

فَضُوحلِّي⁽¹⁾... والحلّ أبو سعيد الُبويَجي

(الحلقة الاولى)

إم سيمي أو" إم سامي"  باللهجة الطرابلسية، هي امرأة طرابلسية بأولّ الخمسين، من سكّان الحارات القديمة، عفوية علّما الفِقر و أدّبا الشارع تَ صارت مرا غير عن الكل، بتعرف "البلد" كلا، بتدور فيها وهي قاعدة على كرسيها، زعيمة على نسوان حارتها وغير حارات، نموذج للمرا القوية، علا صوتها، زادت نبرة كلامها، وغالت في بعض العبارات التقليدية القديمة،  ومع هيك بتبقى ام سيمي ما في عندها خبث، بالعكس طيبة قلبا وسجاذتها عطول بحطوها بمواقف ومواقف !

ام سيمي: ولا كَلُب شو عم تعمل بحديقة الملك فهد⁽²⁾ وتارك ولادك بالبيت عم يشيّطنوا فوق راسي !

ابو سيمي: ولي انا كَلًب يا بنت الهيك والهيك، انا ماني تاركك بالبيت تحتى تاخدي

بالك عالولاد! بعدين مين الرجال ولي!

ام سيمي: رجال؟ من أيمتى رجّال؟ كل عمرك قط مصوّف كل عيطو كانت أمك الحجة تنتفك ياها، يوصول صوتا من مقوبرّ الغُرَبا لباب الرمل!!

ابو سيمي: أنا ولي شرشوحا، بعدين شو جاب سيرة أمي!! شو نسيتي أمك شطّوفت الدراج؟ ولا بتحبّي زكرك فيا ؟؟

ام سيمي: إلهي تنذكر مع موتاك قبل أدان المغرب يا حقّ!! أنا أمي شطوفت الدراج يا ابن لواحظ الرقّوصة؟ كل عمرا أمك ترقص من بيت لبيت متل رقّوص الساعو، ما بتحط ولا بتغط، لَطلعتو أنت وأخواتك الطنعش⁽³⁾ كل واحد بموديل شكال!!

ابو سيمي: إيه، كانت أمي فنانة يا حمارة! بعدين شو بدك ليش كل هالعياط والصريخ ولي، جرّسطينا بين العولم.

ام سيمي: فنّانة رنّانة ايه لَكاَن⁽⁴⁾!! الله يلعنك ويلعن هالعيشة القروف معك!!

ابو سيمي: العيشة معي قرف ولي؟ بذكّرك من وين جبتك؟ من حيّ التنك يا تنكة... يا معفّنة، يا سلّالة، يا بومة!!!

ام سيمي:هييييييييييييييييييي⁽⁵⁾، حيّ التنك بشرّف سليلتك عالقليلة، أبي ما كان طرطور متل أبوك ولا أخي كان حشاش كشاش، وأختي ما كانت حفّافة لفّافة من بيت لبيت، ما شو بدا تطلوع؟ طب الجرّة ع تما بتطلع سميحو لإما، يا ابن لواحظ الرقاصة إنتا!! ما عاجبك حي التنك بقو، ما هاك؟ هبيت لبريت لوصلت لركابي يا كلب!!

ابو سيمي: ولي عم تجيبي سيرة أختي سميحو! لعما بقلّبك صَحِي!!! أختي يا بهيمة فنانة إستعراضية مش متل إختك بتشتغل غسالة وبتغير حفوضوت للختيارية!! وبعدين أنا بريت لوصلت لركابيك؟؟؟ شو نسيتي كيف أبوكي "شوكات" شَلْحِك شلح عليّي؟ لك ما طلب لا مقضّم ولا مأخّر المهم شيلللللل !!

ام سيمي: عالقليلي إختي شريفة ما متل إختك لي عوملي متل باخرة التكنانيك⁽⁶⁾، وفهمك كفاية حبيبي، ولا بتحب اشرحلوك أكتر، إلهي يبليك بحما على هل سليلة، أنا ابي ما طلوب مأخر ولا مقضّم لأنو شافك كحتي أندبوري⁽⁷⁾، عطال بطال مشتهي العضّة بالرّغيف ما في ع جسمك بنطلون تستور عورتك فا، أول مرة جيت لعنا عطيتك بنطلون أخي وقطبّتلك بنطلونك، ولا نسيت يا كلب؟!

ابو سيمي: يه يه يه أنا هيك؟ أنا أخدت بنطلون أخوكي؟ شو نسيتي أنو أخوكي سرّاق التياب؟ نسيتي أنو كنت عندكن عم رجّع تيابنا يلي سرقها أخوكي من منشر غسيلنا؟ ساعتا شفتيك وانضربت عقلبي وحبيتك؟؟ بس يقطع الحب شو ب ذلّ وشو مئرفّ متلك يا أم صنّة يا معفنة!!

ام سيمي: أنا أم صنّة⁽⁸⁾ يا أبو ريحا واصلي من القبّة للمعروض؟ يبعتلك مين يشقّفك تشقيف الهي ولا تلاقي مين يفتح باب الجبانة قدامك.

ابو سيمي: لك كل عمرك نكدية! حقيرو بنت كلب، روحي ضبي غروضك ويللا عند أهلك يا كلبة حتى يربّوكي، وبس تتربي بشوف إذا برديك!

ام سيمي: عما تقلّعني يا ابو سيمي؟

ابو سيمي: لك بقلّعك وبقلّع أبوكي كمان، لعما بقلبك من وقتا تجوزتك ما شفت الخير، والمصايب من وقتا ع راسي متل زخّ المطور! إختك ع إخت هالعيشة معيك، يللا فرقيني ما تخليني طلّئك ترا عليّ الطلاء بالتلاتة ازا اسا بتحكي كلمة بطلئك ها! يقصف عمرك من بين النسوان!

ام سيمي: والله شو والله و صور للكلاب دناب و صورت تحكي و تشترّ!! كل عمرك طرطور أمك يا زمّك، هلق عم ترفع صوتك عليي و تهدد بطالوق؟ أي و شو يعني؟ ما أنا لمّن أخدّتك طبقت المتل لما قال:"من قلة الرجال سميت الديك بو علي!!!"

ابو سيمي: ولي روحي إنتي طولئ طولئ طولئ! لعما بقلبك شو كلبة يللا روحي فرقيني بقا، خليني لحولي عم إستمتع بالمنوظر الطبيعية⁽⁹⁾! يقصف عمريك شو نكدية!

أم سيمي: طوليئ؟ عما تطلقني لك ابو سيمي؟ الهي يطلق عضامك عن لحمك يا حق!! و شو يعني؟ مات الشيخ و ما سكتت الميدنة، و أبو سعيد البويجي من شو بيشكي؟...

ابو سيمي: ما صدقتي سمعتي بالطلاء دغري سنّيتي سنانيك ع أبو سعيد البويجي؟ بس يللا روحي شوفي اذاا بيقبل فيكي، يقصف عمرك منك إلو، هيهيهيهيه صار فيني آخود بهيجة من غير ما حدا يقلي "وام سيمي"

أم سيمي:  بجاه النبي الهي ياخدك أنت و بهيجة!! هيدي المألعطا المجوية⁽¹⁰⁾ لي بتنام ببيت و بتوعى ببيت روح يطرحلك البركة فيّا!!! قول يا مآمني بالرجال متل لي مآمني بالميّ بالغربال!!

وتجوز أبو سيمي بهيجة وأم سيمي أخدت أبو سعيد وكلن عاشوا بسبات ونبات وجابو قرود وقردات... وتوتة توتة خلصت الحتوتة، يللو يقصف عمرك منك الو الا روحو ندفْسوا ناموا ! 

*إنّ الشّخصيات الواردة في هذا النّص هي من محض الخيال المطلق ابتكرها الكاتب صهيب أيّوب، وتناوب على كتابة الحوار توماس سليم بشخصية "أم سيمي"، وطه بابا بشخصية "أبو سيمي". 

-----------------------------------------------------------------------------

1- فضوحلّي : يلي بتعمل فضايح كتيرة وبتخلي سيرتها ع كل لسان

2- حديقة الملك فهد: حديقة يلي بنروح تنعمل فيا سَيَرانات بطرابلس، عقولة يلي بيفهموا "بيك-نيك"

3- الطنعش:  يعني عشرة وتنين، قد صابيعك واصبعين من ايد اخوك

4- لكان : كلمة منستعملها تنقول انو عم نحط على عينك، وغالبا بترافقها حركة ترقيص الحواجب

5-هييييييييي : شهقة، يعني لما بتاخود هوا لجوة بقوة، هيك بتبين قديش مصدوم

6-التكنانيك:  سفينة التايتانيك، لك هيدي يلي عملوها فيلم

7-اندبوري: شحاد ما معو فرنك (عملة لبنانية انقرضت من زمان)

8- ام صنّة: ريحتا طالعة

9- المنوظر الطبيعية: بنتان من سريلنكا قاعدين عم يستجمّوا بالحديقة

10- المألعطا المجوية: الموسّخة يلي صاير لونا اسود من كترة الوسخ

Tweet