Pages

Tuesday, May 31, 2011

نحاس VS ريفي


من الآخر نحاس 8 وريفي  14 (مع حفظ الالقاب)، طيب علقوا 8 و14، سقطت الحكومة، وبراس مين متل العادة، بدها تطلع؟
أنا اليوم ما بدي شدّ لا مع النحاس ولا مع ريفي (مع حفظ الالقاب)، على حياد بس عم حاول فلفش الأوضاع يلي عم بتصير....
الوزير بيتّهم القوة الامنية انو صاروا قوات احتلال، "قوة عسكرية احتلت مبنى سنترال العدلية" هيك بقول الوزير، طيب ازا القوة العسكرية صارت احتلال... وصرنا عم نحكي عن تمرّدات وانقلابات جزئية... أنو مين بدو يحمي من مين ؟
وبيرجع بيعمل مؤتمرات صحفية كيف انو قوى الدرك ما خلوه يفوت يفكفك القطع من أوجيرو تيعطيها لغير شركات... هيك قال رئيس شركة اوجيرو والأضّرب انو ما نكر هالشي نحاس، يعني "ضربني وبكى، سبقتي واشتكى"
من تاني ميلة، اللواء أشرف صحيح انو ما ردّ على وزير الداخلية لما امرو باخلاء المبنى، بس لحظة كمان انا بدي افهم شي، انو ازا حدا بدو يرتكب جريمة وإجت القوة الامنية منعتو، بنشيل دعوة عالقوة الامنية لأن منعتو أو بنأمر القوة تترك الجريمة تصير وازا ما تركتها بنشيل الدعوة؟ معليش حدا يفهمّني، حدا يشرحلي كيف !!
بتزكروا لما تخانق النحاس ورئيس شركة أوجيرو من أكتر من 3 شهور أصلا من الاول هنه متخانئين سوا، وبراس مين طلعت؟ حدا منكم حاول يشتري كرت كلام بهالشهرين؟ عرفتو انو الكروته كلها مقطوعة من البلد؟ يعني الكبينات بالشارع عالفاضي... منظر متل كتير اشيا بهالبلد...
          سمعتو بالأستونين المخطوفين بلبنان؟ (بيناتنا أنا أول مرة بسمع ببلد أستونيا صراحة) المهم لما انخطفوا كمان طلعت براسن القصة، أنو النكايات وصلت لدرجة أنو منعت الداتا عن المحققين، قال ريفي بوقتها: “عندما كنّا في ذروة قضية الإستونيين السبعة والحاجة الى “الداتا” وقتلة راشد صبري الذي له علاقة بهذه القضية، قطع عنّا نحاس “الداتا” وراجعنا العديد من الشخصيات لكنه لم يردّ على أحد نهائياً، وتحجّج بأمور شكلية فقط لا غير”. وكيف انحلّت القصة؟ قرروا يعملوا لجنة للبت بالامر بدل انو يلجؤوا للقضاء!!
يعني دقي واعصري...

الحلو بلبنان ويلي بنفس الوقت مانو حلو، الطائفية، يعني شوفو كيف خلاف متل هيدا تحوّل لطائفية وصار في تجييش طائفي، قلتلكم من الأول ريفي 14 و نحاس 8، والكل بيعرف ريفي طائفتو شو، ونحاس طائفتو شو، واللبنانية فلتون عبعضن و شوف شو بصير ما بدك من يخبرك... بس الحمد لله أنو في حدا انتبه على هالقصة مظبوط، وكان التحذير بمحلو، الاستاذ نبيه كتير حكي وقال كرمال ننتبه من هالفتنة يلي بدها تجر لفتنة سنية – شيعية، كان تحذيرو صريح لأن هيدا يلي بدو يصير بالبلد...
معليش لح احكي طائفيا، أنا عم ادرس بالجامعة اللبنانية كلية العلوم الفرع الأول بالحدث، بالضاحية، ولا مرة سمعت شي من رفقاتي انو في فرق بيني وبينن، كلنا تلاميذ متل بعض، شوفيريت الفانات نفس الشي، "يي انت من طرابلس، عندكن بطرابلس شعب غير شكل، قلبو طيب، لما علقت هون بالـ2006 استقبلونا بقلوبن وقالولنا أهلا وسهلا، فتحولنا بيوتهم وكتير كرمونا، انو حسسونا انو احنا ببيوتنا، يا ريت هالزعما بيعرفوا هالشي، بس وين كانو وقت العدوان؟ بأي بلاد... كلن هربوا وتركونا ناكل القتله" هالشي مش من عندي، مش انا قلتو، هيدا قلي ياه شوفير فان...
حاجتنا عم نلعب دور الغنم، كل شوي بيلعبوا فينا، كيف ما بدهن بحركونا، كل ما دق الكوز بالجرة بيقلبوها طائفية والسرقة عأبو جنب...
البنزين قديش صار؟ ليش توقّف الاضراب العام؟ دخلكم انا كنت متابع القضية لحظة بلحظة، بس لهلق ما عارف شو صار غير الـ 400,000ل.ل. يلي بدن يعطوها للشوفيرية بس... يعني باقي العمال بعدن نفسن وما حدا منهم استفاد شي بالعكس رجعنا لورا وكل اسبوع بتغلى التنكة 500~600 ليرة، يعني واصلين للـ 40,000ل.ل. ما في مجال، بنعطيون 10 تنكات وبناخد حقها منهم ضرايب...
بالنهاية، مش عم افهم تركيبة هالبلد كيف، ومين عم يشتغل عند مين، للأسف عم ننتخب زعما تنشتغل عندن غنم!

10 يعني حق الصوت 10$ ما حدا يروح فكرو لبعيد





Tuesday, May 17, 2011

كبسولة الموت... وعالأوتستراد


بحكم جامعتي يلي صارت ببيروت، وبما انو عندي بس 3 أيام بالأسبوع فمابتحرز استأجر “foyer” ببيروت وعم قضي أوقاتي عالأوتوستراد رايح جاية...
بطلع من البربير بالرجعة عَطرابلس مع كبسولة الموت أو يلي بقولوها الفان، وكل مرة بقعد حد الشوفير والطريق طويل، بنتسلى بالحديث عالطريق...
أبو حسين، من حلبا، انسان خلوق كتير، ما بيدعس فريم من بيروت لطرابلس عفرد دعسة، حكيلي عن ولادوا  وكيف اضطر ينزل عمصلحة "الزفت" الفان، كل يوم بدوا 3 أو 4 مشاوير حتى يلحّق مصروف العيلة، أنو الواحد العادي بولدين مانو ملحّق، كيف ازا عندو 11 ؟! بدك كل يوم ربطين خبز وكيلو لبنة وسطل لبن، غير أغراض الطبخة والبنزين والـ... والـ...
خالد، أبو الدّعس، صار معو شي غير، بيوم وهو راجع عطرابلس  ساعة 1 بليل، وقف لشباب طالعين من الكازينو، جايين من سوريا يجربوا حظن، طلعوا بالفان وقالو لخالد أنن خسروا كل مصارياتم بالقمار، هون دبّت النخوة بخالد وفقعن بهدلة، "غسّلتن تغسيل لك مسحت فيون الاوتوستراد"، (نظرا للرقابة ما رح اكتب كلشي حكيه)، المهم بعد شي سنة، خالد شاف نفس الشباب وكمان وقفوه وطلعوا معو، خالد عرفن بس الشباب ما عرفوخالد، سألن "شو كمان خسرانين وبدكن تطلعوا ببلاش؟"، بس هالمرة طلعوا ربحانين بلاوي زرقا، ومن وقتا خالد بيلعب وصار "حرّيف"  قمار، صحيح أنو باع الفان وهلق استأجر فا ن وصار عليه كسور وديون، "بس  سوسة يا زلمة!"
محمد، 21 سنة، ساكن بجلّ الديب مع ولاد العم، يلي كمان بيشتغلوا بالفان، بالأصل محمد من وادي خالد، صرلو 24 ساعة مانو نايم، بدو يشوف مستقبلو و"يجمع قرشين ما بتعرف الايام شو بتخبي"، بعد انتشارالجمارك عالحدود اللبنانية-السورية، ماعاد يقدر يهرّب عالـ"جحش"، وآخر مرة انكمش الكديش (بغل)، يعني ما عاد في شغل بالمازوت والباطون، فبعد هالمصيبة شو بدو يعمل؟ ايه استأجر فان كمان وهلق عالطريق، من سائق دابة لسائق فان، متل بعض أبدا مافي فرق كلو بسوق...
X (ما عرفت اسمه) ، شافني عم صوّر متل العادة، كنت عم صوّر ولد صغير بالشارع، أهلو شالحينو يسترزق، يشحد، ويبيع علكة... سألني الشوفير ليش عم صوّر، قلتلو هواية، صار يحكي عن هالولاد وكيف عايشين، حسيته مثقف كتير، بالأخير طلع شاب جامعي، دارس بالجامعة اللبنانية، "طيب ليش جيت لهون؟ ليش ما كفيت درسك؟"، جوابه:" بعدني علقان بمادة عالتخرّج"... ما عرفت شو كان لازم قلو، للأسف عنجد في تلاميذ هيك، بيقرفوا وببطلوا الدرس!
"لا تلحقني.. مخطوبة" هيك كتب عادل عالفان، كرمال هيك طلعت معو، بس كان مزاجو كتير زفت في فان تاني كبس عليه (بلغة الشوفيرية يعني ماشي قدامه وعم يلم كل الزبونات عن الطريق قبله)، ومتل فيلم الاكشن، بعتقد وصل الكيلومتراج للـ170 وسبقوا لما وصلنا عطرابلس...
هيدي كام قصة من يلي بسمعها كل يوم، بنتسلى عالطريق لأن الطريق طويل...





Monday, May 9, 2011

مصلحة الشغل بالعالم... النيابة

مصلحة الشغل بالعالم... النيابة

بهالبلد احسن وظيفة تكون نائب، شيلك من الزعامة والإسم والصور يلي بتلي البلد وخصوصي ازا كان عندك خدمات تقدمها للهمشرية يلي عندك (همشرية يعني بوطة أو مجموعة)، اليوم بدي احكي لغة الارقام، لغة مصّ الدم.
من فترة قرأت جملة معبّرة جدا، "أنت نائب لبناني... اذا أنت في نعيم حتى ولد الولد"، تحرقصت صار بدي أعرف ليش؟ وكيف؟ ومين؟  قرأت أكتر عن النواب اللبنانيين لحد عرفت شو سبب التهافت عالنيابة بلبنان...
كل مرّة بصير انتخابات، بتشوف الصور مليت الشوارع، أسماء كتيرة، عنوانين "من الشعب، لمص دم الشعب"... عفوا قصدي "من الشعب والى الشعب"، في منن بيترشحو وبيدفعوا التأمين  40,000,000 ل.ل. كرمال الاسم، ولو بأمرك فلان مرشح سابق، وأغلبن بينسحبوا قبل أسبوع "لمصلحة فلان فلان"، بالمشبرحي بينسحبوا لأن في حدا دفع حتى ينسحبوا أو كرمال يسترجعوا مبلغ التأمين...
وفي غيرن بيترشحوا لأن حسبوها بشكل غير، هالـ 40,000,000 ل.ل. مش رايحة هيك صحيح أنو هالمبلغ بيستردوا فور حصول المرشح على نسبة معينة من الاصوات، بس حتى لو ما استردوها بنفس الوقت مانها مشكلة، بـ 4 أشهر بيستردوا المبلغ كله وحبة مسك كمان...
بعد التفكير والتدقيق، مصلحة النائب هيه أكتر مصلحة بتطلع مصاري بلبنان، مخصصات وتعويضات النائب بلبنان حسب القانون رقم 717:
1.     المخصصات: 3 مليون ليرة.
2.     تعويض تمثيل: 1.5 مليون ليرة.
3.     تعويض سيارة وهاتف: 1.5 مليون ليرة.
4.     تعويض تشريفات: مليون ليرة.
5.     تعويض سائق وأمين سر: 1.5 مليون ليرة.
6.     المساعدة الاجتماعية: 2.7 مليون ليرة
وهيك بكون ومعاش النائب بس  \\11.200.000 ل.ل.\\ ، بنشيل منن المساهمات مثل مساهمة الاستشفاء، فبيوصل المعاش الصافي الى \\10.952.000ل.ل.\\  فقط لا غير.
هلق يلي بفكر انو بس القصة وقفت عند هالمبلغ، فلازم يتذكر اسا شوية اشيا، القانون بيسمح للنواب اللي اشتغلوا بمناصب أو وظائف حكومية (المدراء العامون، الضباط السابقون، القضاة...) انو يجمعوا معاشاتهم، بالمختصر الله أعلم أديش بيقبضوا بالشهر هون وهونيك سوا...
كمان بنزيد الأمور التالية:
1.     المرافقة والحمياة:
أكيد مش النائب بدو يدفع من جيبتو لعنصرا أمن الدولة يلي بيسهروا تيحموا فخامته (هيدي مش أقل من 1.5 مليون ليرة كمان). 
2.     سيارة بلا جمرك ولا مكانيك:
يعني كل نائب بجيب سيارة بلا جمرك علبنان وبينعفى من المكانيك، وازا خسر بالانتخابات التانية بسيطة بس بيدفع المكانيك (هلق هيدي ما بتنفع كل شهر لأن الجمرك مرة وحدة عالسيارة بس لما تحكي بين الـ30 والـ40 مليون ليرة جمرك عالسيارة، انا بقول يللا خليه يوفر شوي على رأي المتل بحصة بتسند جرّة).
3.     اعتمادات الاشغال:
بالموازنة كل سنة في بند لتخصيص مبالغ للنائب حتى يصرفها بمعرفتو على مشروع واحد او أكتر، صحيح أنو وزارة الاشغال العامة ما بتراقب هالمشاريع ان كانت موجودة أصلا، بس الفاتورة لازم تندفع، وبتتقدر المبالغ المدفوعة حوالي 100 مليون ليرة سنويا... 
4.     جوازات السفر:
جوازات بالجمع، لأن النائب ومدامته وأولاده (تحت الـ25 سنة) وبناته (غير المجوزات والمطلقات والارامل)، كلهن بيطلعلن جوازات سفر خاصة ومجانية وتأشيرات ببلاش حسب الدولة. حتى النائب ازا كان بده يكزدر والعيلة ما يعتل همّ الـ300,000 ل.ل. عكل جواز وما يعتل همّ سعر التأشيرات، صحي أنه شركة طيران الشرق الأوسط رغم كل التسهيلات بتعطي البطاقة بحسم بيوصل للـ50% بس ولو هيدا نائب يا جماعة...
5.     مكتب خاص:
يعني كل نائب بيطلعلو مكتب خاص بمبنى ملحق لمجلس النواب مع كل الخدمات مجانا (يعني full option من جميعو، كهربا، ميّ، تلفون... )
عفكرة بعد 6 سنين شغل بالشعب، ازا صار النائب، نائب سابق لان في حدا اشترى الاصوات بدالوه وأخذ كرسيته كمان بالمجلس، هيدا النائب السابق ما بروح عليه كتير اشيا لأن أغلب هالامتيازات والمنافع بتدل نفسها زاتها وخصوصي جواز السفر والطبابة...

بلبنان بتتقدر كلفة النواب السابقين حوالي 20 مليار ليرة سنويا. مع العلم انو اغلبن زناكيل ومعهن أموال ربنا... طيب النائب بـ6 سنين بيضمن مستقبلوا ومستقبل أولاده لآخر عمرهم، وصحيح الموظف العادي بيقبض تعويض ازا تقاعد ومعاش النائب السابق بتطلع أكتر من 40 مرة ضعف معاش هالموظف المسكين... بس بعدها وزير المالية ريّا الحسن لاحقة هالمتقاعد التعبان وتاركة النائب المليان، وعم تطالب بتوقيف معاشات التقاعد يلي لولاها العالم بدها تاكل تراب وخصوصي بوجود قانون ضمان الشيخوخة...

ملاحظة: لما قررت ابحث عن معاشات النواب اللبنانيين ما قدرت لاقي شي بـ”website” وزارة المالية اللبنانية، أبدا، أبدا، أبدا... بس بعد البحث الكبير لقيت مرجع أجنبي وللأسف!

Wednesday, May 4, 2011

الكلمة في حفل انهاء مشروع "أهل العيش الواحد" طرابلس


بسم الله الرحمن الرحيم

حضرة رئيس بلدية طرابلس، السيد نادر الغزال، حضرة السّيدة سلوى سنيورة، رئيسة منظمة الاونيسكو و شبكة انا ليندت، اصدقائي في جمعية شباب البلد و برلمان الشباب...
الحضور الكريم:
مش رح احكي بالفصحى، بس لح احكي بلهجتنا الطرابلسية. الكل سامع بالمتل يلي بقول:"بيناتنا خبز وملح"
الصورة يلي فوقي بتمثل عادة على طريق الانقراض، حتى انو في طرابلسية ما بيعرفوا شو هيدا وبيسألوني شو هيدي السلة، هيدا "الارطل" يلي الكل كانوا يستعملوه، انا ببيتي القديم كان عنا متلو، هيدا هوه الارطل، السلة يلي بتنقل الخبز والملح بين الجيران، كانت بينا وبين جارتنا الحجة ام أحمد، قديش كان الجيران يستعملوا الارطل ليوَدوا لبعضن الملح والزيت والخبز و"راس بصل" وهيدا هو قمة العيش المشترك يلي بيوصل حتى للقمة الخبز...
هيدي العادة وللأسف بدأت بالانقراض، ما عاد في منها كتير، للأسف عم نخصر عاداتنا الطرابلسية...
وهون بيجي دور الاعلام، والتصوير تحديدا، انا كتير بشكر شباب البلد يلي نظموا هالمشروع، لأن الصورة بتحكي اكتر من 100 كاتب...
مسيرتي بالتصوير مش من زمن بعيد، من وقت يلي تلقيت نصيحة من الـ”professional” السيدة مايا علم الدين، قالتلي لما سألتها وين تعلمتي التصوير؟، أنا ما حدا علمني انا تعلمت لحالي وانت فيك تعمل هيك، حفظتها وتبقطتها بس صرت كل يوم اسأل مايا عن بعض الاساسيات وكانت هي المعلمة ذات الفضل العظيم.
كمان ما بنسى ابدا عبد الرحمن مصطفى يلي نقالي الكاميرة و كان انتقادو عطول من النوع البناء "اتنبه للضو، للزاوية الفلانية للأيزو" بتعرفوا شغلة مصورين...
بشكر كمان صهيب ايوب يلي اطلقني بعالم الصحافة ! 
هيدي الصورة تكريم لكل فرد من عيلتي بالعمل الاجتماعي، بشكركم فردا فردا، أبي، أمي، مايا، عبد الرحمن، حسن عثماني، خالد مرعب، محمد مير، والليستا طويلة !! ما شاء الله عيلتي كبيرة! ما كنت بعرف كل هالقد عندي محبين، شكرا لكل يلي اجو وعم يدعموني كل يوم...
وبتمنى تكون المشاريع الجاية بتصب باحياء هيدي العادات القديمة لأن طرابلس اليوم غير طرابلس مبارحة.
للكل بقلكم هيدي هديتي الكم بتمنى تكون عجبتكم الصورة.  

Sunday, May 1, 2011

بلدية الانجازات

بلدية  الانجازات


عنوان كبير لموضوع صغير، عنجد البلدية الحالية لطرابلس عندها انجازات، الصفحة عالـ
“facebook” للتواصل المباشر مع العامة ولسماع شكاوى وحذف بعض الـ”comments”، وحتى الرد على البعض الآخر.
 مشروع تأهيل المنشية وانشاء حمام جديد فيها، بالرغم من وجود مشكل بالهندسة لأن المهندس نسي موضوع الشتي، بس فينا نعتبر انو هيدي عبقرة هندسية، ليش تنكون عطول سلبيين؟! في بالعالم كلو منشية ومسبح بنفس الوقت؟ شفت طرابلس غير، مسبح بالشتي، هيدا الذكاء بعينه، ما بعرف انا هيك سمعت...
             ما بننسى ابدا صور التزفيت على حساب البلدية وكيف لون الزفت يلي على حساب البلدية بالصور، صحيح اسا لهلق ما عرفت وين صارالتزفيت يلي على حساب البلدية لأن رجعت الحفريات والجور وكأنها أخدت “Anti-Ziftique” ضد الزفت والترقيع، او انو ازا كان التزفيت يلي على حساب البلدية خارج نطاق طرابلس، بس يلي مستغرب منو انو زفت وعلى حساب البلدية حاسس في ربح جميلة بالدق بس احساس يحتمل الخطأ ولو كان على حساب البلدية...
كمان مشروع اطلاق اسماء جديدة لشخصيات محببة على شوارع طرابلسية، وكتير لفتتلي نظري
شغلة كتبا صديقي تحت صورة من صور الافتتاح، "أنو كانوا ينضفوا الرصيف بس كرمال الصورة"، صديقي ما معو حق 
 بهالتعبير كان في شوية حشيش يا دوب النص متر كل شتلة...

             من اقوى المشاريع، مشروع اعادت احياء عادة طرابلسية، الناموسية، هلق يمكن عادة لبنانية مش بس طرابلسية، بس انا صرت استعملها، لك ايه ايه بستعملها ما تستغرب، اشتريت ناموسية وركّبتها، كان بالأول (في زمن البلدية السابقة) من فترة لفترة نشوف غيوم كتير ببساتين الزيتون، نسأل
شو هيدا يقولولنا البلدية عم ترش سم للبرغش، ونرجع نشوف السم الابيض حد كل مكب زبالة، وما نرجع نشوف برغشاية كل السنة...
هلق البلدية عم تستعمل “ExtraBorojo” بدل السم، خصوصي بعد اكتشاف القوة الخارقة الي بيعطيها للبرغش، وبدل تشوف البرغشة صرت تشوف قبيلة برغش، مصفوفين متل العسكر، وكلها عتاد ومجهزة بأحدث الادوات، صار عندها “mask” مضاض للسموم المنزلية “VAP”،”PifPaf” كلها بطلت تفيد، بس كمان هيدي عندها وجه ايجابي، ليش تتحس انو الدولة والبلدية وشركة الكهربا ومصلحة المي والتلفون، ليش تتحس انو وزارة المالية كل اسبوع بتزيد عليك 400 أو500 ليرة، ليش تتحس انو الكل بمص دمك أول الشهر أو كل اسبوع؟ تفضل هيدا البرغش
بمص دمك كل الشهر مش بس أوله... ولو القصة بدها شوية تفكير وتحليل...

ما بنسى انجاز كبير، تحرير املاك البلدية من المحتل يلي كل العرب شافوه وسعموه عالـ”MBC4”، كورال الفيحاء، الكورال الشرير يلي كان مستولي بالقوة على غرفة من مبنى البلدية للتمرين، بس بفضل القوة الجبارة للرئيس الحالي، وعناده ضد باقي الاعضاء المتحايزين للمحتل، تم تحرير الغرفة من هذه المجموعة المحتلّة... وبفضل هالشي فقد الكورال حياديته بنظر البعض بعد تلقيه دعم من احد السياسين، الي بكل شرف وضمير حاول اكتر من مرة، انو يشتري الكورال، عفوا انو يدعم الكورال، لأن الخيار كان يا بتاخدوا، الدعم يا بتتشردوا... بس قولكم كان في لعبة مشتركة؟؟ سؤال بيخطر ببالي كل مرة بس ما بعرف جوابه...
بالنهاية وبعد كل هالانجازات الجبارة، أكيد أكيد أكيد مش رح انتخب بعض الاعضاء بهالبلدية ومنهم الرئيس طبعا لولياة جديدة، وان شاء الله بتكون هيدي آخر مرة بيستلموا فيها مصالح الناس...