فكرت عن شو بدي اكتب،
فكرت بحل تعيش كلبناني،
فكرت بحل يكون جذري،
فكرت بحل يكون عملي،
وبعد طول تفكير طلع الحل!
الحل كتير بسيط، نص التلاتة خمس وربع ملوحة البحر زادت نسبة رطوبة النار يلي عملوا فيها سكت ترين بتمشي بالبحر طيران...
فكركن عن جد لح لاقي حل؟ في حل للمشاكل بهالبلد؟ ليش هيدا بلد؟ هيدول بشر؟ هيدا شعب؟
عطيني سلاح وكتيبة زعران وشوف شو بعمل... عطيني دنم حشيش وشوف
شو بعمل... عطيني متفجرات وشوف شو بعمل... بس الله يرضى عليك
اوعا تعطيني سيجارة بيطلع عليي ظبط بعدين...
عملو شهر امني مبارك، شدوا ع ايد بعض ونشروا الدرك والجيش والفهود والمغاوير وكل اركان الدولة، بس عمو ميسيو الدركي ممكن تهز كرشك شوي وتنزل من سيارتك يلي عم تعبي بنزينا من جيبتي تتحرسني مش تتجغل ولا تتلطش ع بنات الناس... يا وطن ممكن تطلع من ملالتك وتحمي الوطن بدل انو تتخبا فيها وتسكر الباب والحرب برا شغالة شمال ويمين... وبس حدا يحكي بهددوه برفع الحصانة...
عطوني سلاح وكتيبة زعران، على قولة المتل، يلي بضهرو سياسي يحط ايداه واجريه بمي باردة، لو عندن فيديو وصوت وصورة وشهود ودلائل و كل شي ، كلو بلا طعمة واطخن كفالة بيدفعها عنك الوزير شخصيا، ازا ما وصلك عالبيت بسيارتو كمان...
ممكن شي حدا من هالزعما يسجل موقف من عمليات الخطف والقتل يلي عم بتصير بهالبلد؟ مجهولين من الخارج، مجهولين من الداخل، ومجهولين عم يخطفوا حالن كمان...
ممكن تشيلوا قانون الانتخابات عجنب شوي وتفكروا بقانون حق العيش الكريم للشعب الكريم، قانون الكهرباء للجميع؟
ممكن شي حدا منكن يوقف تفكير بكرشه ويفكر بالجورة يلي عباب المطار أو تاركينها لاستقبال السياح ؟ ممكن تشيلوا الغطاء السياسي عن يلي عم يقتلكم غنمكم يلي اشتريتوه بعد ما جوعتوه ونتفتوه وسلافو حرقتوه؟
لك ايه ايه عطوني سلاح وكتيبة زعران وشوفوا شو بعمل، بسكر البلد وبفزع العالم وبقطع الكهربا وما تستغربوا بصير عضو بالمجلس النيابي كمان....
