ما بدي فرص عمل ... بدي اتخرج بالاول

تبدأ حياتك طفل ولما بتبلغ الثالثة من عمرك، يدخلك أهلك المدرسه، فتبدأ حياتك التعليمية، قليلون يبقون حتى صفوف الشهادة، قليلون ينجحون بالشهادة الرسمية من أول دورة...

 بعد النجاح تظن أن العلم أصبح سهلا، لقد أصبحت تلميذ جامعة، أصبحت من الطبقة المثقفة التي تهتم بالثقافة والمشاريع و قرارت المهمة و خصوصا في هذا البلد أصبحت من ذوي القرار و أنت إسا ما بحقلك تنتخب بعد...

لحظة، أنت وين رايح ؟ حددت قرارك أو بعد ؟ تأكدت من الإتخصاص ؟ أو بالأحرى حسبت كم تستطيع أن تدفع للجامعة كي تختار الاختصاص الذي تحب؟

أنا عن نفسي قررت الذهاب أولا إلى بيروت كي أكمل دراستي هناك في جامعة خاصة ذات قسط معقول، يعني ما بدي خلي بيه يبيع بيتنا يلي ساكنين فيه حتى كفي درسي...بس للأسف صار عدوان 2006  و ماقدرت إنزال عا بيروت !! 

كنت عارف إنو الجامعة اللبنانية هييه أقوى جامعة في لبنان، و حتى بتطلع الإشاعات أنها الجامعة الوحيدة المعترف بها دوليا، وين و أيا محل بدك تروح عليه، شهادتك معترف فيها وفيك تشتغل فيا مباشرة ...

دخلت الجامعة أول يوم وجدت رفقاتي طالعين قبل طلوع الضو حتى ييحجزوا بالصفوف الأمامية، ما تخيلت إنو قاعة ٢٥٠ كرسي بدها تسع أكتر من 760 تلميذ هيدا بس أول يوم، تاني يوم بنصير شي 500 بالقاعة الواحده...

كفينا أول يوم و تاني يوم تعلمنا إنو نكون بكير بالجامعة، نكون بالجامعة قبل شأشأت الضو، أنا عن نفسي كنت إطلع عالجامعة ساعة  5:00 الصبح و إنتظر بالبرد والزمهرير حتى يجي أبو محمد يفتحلنا باب القاعة عالساعة 6:30 ...

الطلعة بكير عالجامعة مش كرمال حجز مقعد بالصف الإمامي، الطلعة بكير عالجامعة كانت كرمال الحجز على باب القاعة كرمال نفوت عالقاعة قبل غيرنا...

منافسيني عالباب كانو كتار، كتير كتار... سناء كان بيتها بالقبه حد الجامعة شي 400م، ربيع من سكان عكار و بده من بيته للجامعة شي ساعتين عالطريق ! طيب هيدا أيا ساعة عما يفيق ؟ أيا ساعة عما ينام ؟ كنا نخلص من الجامعة بعد المغرب و يرجع ربيع يطلع على عكار...

مع هيك كفينا و طلعنا عالجامعة بكير و فتنا و حجزنا أول صف و بلشنا درس ودرس ودرس...

 "من طلب العلا سهر الليالي" مرت أيام ما نمت فيا ولا عرفت شو يعني نوم... و بلشنا ندرس و ندرس و ندرس... و جاءت الصاعقة أول إمتحان، نسبة النجاح 12% فقط... "معقوله عند الدكتور فلان يسقطوا التلاميذ أكتر من عندي" هذي عبارات سمعناها كتير و لمسناها كتير، "أنتم شو عما تعملوا هون ؟"، "ليش جيتو لهون؟ قوموا روحوا عكلية الأداب هونيك للفشله يلي متلكم"

عبارات زغيره بس كانت تهدنا وتحطم معنويتنا... كانو التلاميذ يهربوا من الجامعة و يروحو على أول فرصة عمل شوفير صينيه، إستاذ خصوصي أو حتى عتال... 

بيحكولي على تأمين فرص عمل للشباب، بيحكولي و بيسألوا عن مؤسسات سكرت لما كان جدي بعدو شاب الله يرحمه، بس كل يلي بدي اسأله... ليش بدنا نأمن فرص عمل لشباب غير كفء ومش من ورا إيدن بس لأن الدكتور عند بالجامعة مغتاظ لأن سقط تلاميذ عند الدكتور التاني أكتر من عندو!

لأيمتى بدنا نضل نشوف شباب عما تيخد ليسنس سنه أولى (3 سنين جامعة وبعدن سنة أولى)  قبل إنو يصيروا سنة تانيه هيدي حالنا كانت بالجامعة اللبنانية كلية العلوم الفرع الثالث...

الحكي غير الشوفه، و يلي بيدوق بيعرف...


مشهد من مشاهد الجامعة اللبنانية:
http://www.youtube.com/watch?v=H9z5bDnqT5Q