Pages

Tuesday, June 7, 2011

الخائن العميل... البرغش



       بِتْطير هون وهون، بتوزّ وبتطنّ بدينتك، بتكشّها مرة وتنين بتقوم هي بتكشّك، بتسهّرك للصبح وايام ما بتنيّمك...

       بقول رفيقي، خبير البويا والطرش والدهان، المحلل اللبناني الكبير، هيدي القصة كلها شغل الأمريكان، إنو مين من مصلحتو تنمصّ دم الشّعوب العربية عامة والشعب اللبناني خاصة، غير الامريكان؟ بعدين القصة أكبر من هيك، حسب رأي صديقي، لأن البرغش بيحمل معه أمراض، متل دبّانة "التسي- تسي" يلي بتحمل الملاريا، يعني وبلا فلسفة، الاسرائلييّة عم يحقنوا كل برغشة بأنواع فيروس مهمتها تزيد الشهوة عند الرجال، هيك بينسى الشعب القضية الكبيرة ويفكّر بالقضية التانية، قضية النسل...

       بكفّي صديقي وبقول: يا عمي شوف الغرب ما في عندن برغش ولا شي، أصلا لأن الغرب كله ما في عندن اسرائيل حدنّ وبعدين من وين فكرك اسرائيل عم تجيب البرغش تترشو هون؟! ...

       القصة وين؟ بدك تعرف كيف بيعطوا هالادوية للبرغش عندك حلّ من تنين، بعد ما بيجمعوا البرغش كلو يلي بالعالم الغربي، بجيبوهن، بيعطوهن ابرة، وبعطوها مضاضات للمبيدات هيك بتعيش أكتر وبتمص دم أكتر، والاهمّ بتنقل الأمراض أكتر... أو بدن يكونوا اخترعوا دوا متل الفياغرا بس للبرغش، مش ملاحظ كل ما ترش VAP البرغشة بصير عندها قوة وحيوية بدل ما تبيض 10.000 بيضة بتصير تبيض مليون...

سألته طيب كيف بيبعتوها علبنان؟
       جوابه تحت لسانه متل العادة، ردّ وقال: ولو ما بدها ذكا يا زلمي، بالطيارات يلي بتخرق الصوت هيك ما حدا بينتبه للبرغش وكيف عم يرشّوه بلبنان... أو في طريقة تانية، بسلامة فهمك، الموساد شو شغلته فكرك؟ يعني في عندك شي اسمه "تصنيع محلّي للبرغش"، بيستوردوا بيوضها وبفقّسوها هون، هيك بوفّروا أجار طيارة، عندك حرب دايرة وكل قرش بتوفّروا بينفع لشي تاني...
      
        خلّص صديقي فلسفتو ضحكنا وضحكنا كمان، وقلتلو يا صديقي كل القصة ما بدها كل هلقد تحليل وفلسفة، ولا بدها كتير تشغيل راس، كان ياما كان، كان في جهاز بالبلدية لمكافحة البرغش ورش الدوا للدبان، كانوا يرشوا بساتين الزيتون والليمون، بس للأسف البلدية صرلها زمان ما رشّت ولا اهتمت بهالعالم وراكضه عالتصوير والدفع والحرّاس الشخصية...


Share it on Twitter

8 comments:

  1. انتقلت العمالة هلأ من الأمركان للبلدية؟ هههههه على كل حال ماحكّ ظهرك مثل ظفرك. عليك بأقراص ال
    ما ال سبرايVape
    . واسأل بها خبيرا

    ReplyDelete
  2. sorry taha bass te7lilak ma ktir ana3ne add ma ana3ne 7adis sa7bak!!! ana be3tezer menak hahaha
    nice post!!!

    ReplyDelete
  3. Ymn: العمالة مابتعرف الطريقة المهم الهدف
    layal: هههه لو كان صديقي زعيم كان قنع كتير عالم

    ReplyDelete
  4. hahahha ,, lk hayda msh barghash !! hayda DINOSAUR !!:P

    ReplyDelete
  5. walah kel she ma32oul ya taha w feha wejhet nazar kel ma menreish hal bargash 2ou men 7etoloun 2ras ka2nou 3am ta3tehoun vitamin walah kel she jayeiz nice nice taha realy 7elwe

    ReplyDelete
  6. Anonymous1 : heneh 3ama yekbaro shwy shwy ma3ik 7a2 :P
    Anonymous2 : haha hayde betdala theories 7ata tesbot w lama tesbot bikono khtara3o shi gheir

    ReplyDelete
  7. عجبتني فكرة انو البرغش مستورد. صراحة ما ضل الا البرغش ما اجانا من برا. بس في سبب أكيد.
    واللي بيطلع عالموضوع من برا بيشوف انو من كتر ما كتر البرغش الكبير بالبلد (هيدى البرغش اللي بيمشي وما بيطير واللى بيمص دم وعرق العالم كمان) ما عاد حدى اهتم بالبرغش الصغير وبيقولولك هيدى أمرو هين. يا بيموت ب VAPE يا بيموت بكرى من الشوب على قطع الكهرباء.
    وبعدين لك خيي ليه انت كتير حامل عالبلدية. خليها بحالها. والله مشغولين بالمانشية و ما في ببالهم الا البلاط يطلع حلو. مين فاضي هلأ يطّلع على صغائر الأمور البرغسيّة.

    ReplyDelete
  8. هههه يا زلمة عن شو عم تحكي كرمال المسبح العام(المانشية)؟ بعدين انا مش حامل كتير كتير كتير عالبلدية، بس أنو شي منو كمان، في أمور بديهية لازم تعملها البلدية!

    ReplyDelete